Ukrayina ve Rusiye arbiy esirlerni deñiştirdi, dep bildirdi Ukrayina prezidenti Volodımır Zelenskıy oraq ayınıñ 4-nde.
“Bizim adamlarımız evde. Olarnıñ ekseriyeti 2022 senesinden berli Rusiye esirliginde edi", — dep yazdı o telegram kanalında.
Zelenskıy, Donetsk, Lugansk, Harkiv ve Herson vilâyetlerinde cenk areketleriniñ iştirakçileri evlerine qayttı, dep añlattı:
“Bular Silâlı quvetler, Milliy gvardiya, Devlet sıñır hızmeti, Devlet mahsus naqliyat hızmetiniñ askerleridir. Em de siviller”.
Zelenskıy, deñişmeler devam etmeli, dep qoştı ve buña yardım etken er keske teşekkürler bildirdi.
Cenk esirleri koordinasion ştabında, esirlikten "Yaralılar ve ağır hastalar" ve "25 yaşını toldurmağanlar" kategoriyasından esirler qaytarılğanı qayd etildi.
"Azat etilgen eñ yaş qoruyıcı 20 yaşında. Eñ büyügi 59 yaşında. Asker ve serjantlardan ğayrı, ofitserler de azat etildi", — dep qoşa Kordştab.
Bundan ğayrı, Rusiye tarafından qanunsız sürgün etilgen arbiylerni ve şahsiy azatlıqtan marum etilgen ukrain vatandaşlarını azat etmege imkân oldı, dep bildire müessise.
Azat etilgenlerniñ tam sayısını deñişimniñ bütün basamaqları yekünlengen soñ bildirmekni vade eteler.
Rusiye-Ukrayina deñişiminiñ evelki basamağı ilk yaz ayınıñ 26-nda olıp keçti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
